傳媒訪問

「雙曾配」選特首 曾鈺成:冇呢件事喎

2016年7月20日 《AM 730》專訪

下屆特首選舉明年3月舉行,坊間開始「估領袖」,政圈近日更熱傳「雙曾配」,即財政司長曾俊華與立法會主席曾鈺成「拍住上」搭檔參選。曾鈺成昨接受本報專訪時笑談這個傳言,指「唔明咩叫『雙曾配』」,並斷言「冇呢件事喎」,不過,他不肯百分百排除參選的可能,並繼續賣關子,重申「拭目以待」。文:鄭秀韻 攝:陳奕釗

自政圈傳出「雙曾配」組合後,兩位當事人從無公開承認或否認,曾鈺成首次回應這個傳聞,他笑言,「我都唔明咩叫雙曾配?即係點呀?下一屆雙特首呀?」記者追問誰是「膽」、誰是「腳」,他繼續笑著說,「我唔明喎,冇喎,冇呢件事喎,要提出『雙曾配』嘅人詳細說明吓先得,我都想知道。」

常被配不同人選 「係咪覺得我好花心?」

「雙曾」民望在司長及議員中同居榜首,若兩人拍住上不失叫好及叫座,但他說,「我都未知係一回咩事,我點會評論是否成事呢!」他繼而自嘲,「之前亦有人講過,話我同(前財政司長)梁錦松行孖咇,我呢個人唔知點解配完一個、配第二個,即係覺得我好花心係嗎?配完一個配第二個,我唔知下一次又話我配邊個……咁點解要配呢?我唔明喎!」

至於會否單人匹馬選特首?曾鈺成重申有自知之明,「有邊啲嘢我做得到我知,但有邊啲嘢我一定做唔到我亦知,如果我真係考慮做行政長官嘅工作,我自知有好多困難我需要克服,而我冇呢個信心可以克服得到,所以最好係合適嘅人出嚟(選)。」他補充,「如果我能夠喺一個我覺得更加從容、即我自己更加有信心處理到嘅位置上嚟幫手、出力,我好樂意啦。」

曾鈺成對是否參選特首的態度,由年前斬釘截鐵表明「不會」,至近日一改口風,包括「拭目以待」及「不會無動於衷」,令人聯想他「蠢蠢欲動」。他指確實有市民鼓勵他選特首,「今朝喺街,不下5、6個街坊叫我選特首,呢個係事實」,但他說,過去不論如何表明不會去馬的心跡,亦無法制止被問同樣問題,故索性套用林鄭月娥的答法——「拭目以待」。不過,他始終無完全閂後門,「咩叫閂後門呢?我所有啲後門好、前門好,閂得都可以開得番,鎖咗你都可以開番㗎嘛,冇意思㗎!」會否有一日宣布「當仁不讓」?他朗聲大笑,再吐出「拭目以待」的標準答案。

香港要贏 一國兩制要成功

今屆立法會上周五結束,曾鈺成宣布休會前作肺腑之言,指「祝福香港,香港一定要贏!」問他「贏」的定義,他說任何人也有不同理解,「可能泛民會覺得香港要贏,就要普選、真普選;建制派可能覺得香港要贏,就要大家放低政治爭拗、做實事……」至於他個人的看法,「我覺得香港要贏,就要『一國兩制』真係成功,要贏番香港人、中央政府以至國際社會對『一國兩制』嘅信心。」他坦言不知何時會見到這個「贏面」,但相信未來5至10年、即未來一、兩屆政府是關鍵,「一定要處理好普選、政改問題,一日未曾達致《基本法》所講政制發展嘅最終目標,一日都唔能夠講『一國兩制』已經成功。」他嘆氣說,若未來5至10年做不到上述目標,將難以如人大委員長張德江所指「保持耐心」及「堅定信心」,「如果10年做唔到,我諗大家好難維持對『一國兩制』嘅信心。」

下任特首要將通過政改作政綱

至於下屆政府是否有政治能量重推政改,他形容「我哋一定要做」,這亦是任何競逐下屆特首的人都要面對的問題,讓公眾、1,200人選舉委員會及中央有信心,認為有關候選人可順利重啟政改以爭取通過方案,「如果一個人出嚟參選下屆行政長官,『話我唔做㗎,呢屆唔會重啟政改,又或者話點重啟政改呀?重啟咪又拗一餐,大家打餐懵,跟住冇結果㗎喎,搞嚟做乜?』如果係咁,我會認為呢個唔可能回應到時代需要。」他又說,「下任行政長官,就算現任行政長官連任嘅話,一定要將成功通過政改方案作為佢政綱嘅首要項目。」

特首參選人要將通過政改方案作為競選承諾,他質疑為何難做到,「起碼佢努力去做,話俾香港人聽會全力以赴,去推動政改能夠通過。」前政務司長唐英年去年接受本報訪問時曾說,為讓社會休養生息,下屆政府不應重啟政改,曾鈺成認為這種想法「唔得㗎」,他說,「樹欲靜而風不止,唔解決到呢個問題,想大家停晒啲政治爭拗,集中精神搞經濟、搞民生,呢個係不切實際。」

明年屆古稀之年的曾鈺成,無明言是否有信心有生之年見到普選,他只重申,若未來5至10年實現不到普選,將難令人維持信心,但他說,「政治嘅嘢,邊個敢講死!」他一再重申,未來兩屆政府有不可推卸的責任,促使中央及香港社會凝聚共識,通過普選方案。

「仰觀天色改,坐覺妖氛豁」借杜甫詩句比喻時局

曾鈺成上周四在本報撰寫的專欄,以「仰觀天色」為題,利用兩人虛構的對話,論述立法會選舉與特首選舉的關係,但文章並無引起關注,他私下對友人暗嘆「白寫了!」他昨日重提文章,透露只有立法會議員梁國雄「睇得明」,形容對方「好叻」。

「仰觀天色」出自杜甫的《北征》其中兩句——「仰觀天色改,坐覺妖氛豁」,該詩意指「抬頭看看天色的改變,覺得妖氣正在被消除。(以妖氣喻安史叛軍)」。

中文了得的曾鈺成向來愛借詩句比喻時局,他為此親自解畫,指詩中的「妖氛」不一定指妖魔鬼怪,可解釋為迷霧,一如北京的霧霾,令人呼吸困難或看不清楚視野。他繼而入題,「有一段時間,的確好多香港人可能會問,中央政府係咪仲繼續堅持俾香港行『一國兩制』?中央政府會唔會改變咗對香港政策?」

他指人大委員長張德江月前來港的言行,包括會見立法會各黨派代表,以至港澳辦主任王光亞近期的言論,令他想起上述兩詩句,「即係令人重新睇到中央官員好清楚表示態度,好堅持『一國兩制』,不忘初心,要有耐心,要堅定信心,就係咁解。」

爆高永文長氣 只餘1分鐘講「肺」話

今屆立法會會期上周五深夜結束,《醫生註冊(修訂)條例草案》最終未能付諸表決而難產,食物及衛生局長高永文當晚「超時」發言,令最後一次主持大會的立法會主席曾鈺成大失預算,只有1分鐘時間發表「香港一定要贏」的臨別「肺」話。

曾鈺成重提當晚情況,他指高永文原先向他「寫紙仔」,要求當晚11時45分才發言,並指發言時間約5至10分鐘。曾鈺成說,「我認識高局長嘅,知佢會比佢嘅估計講得長」,故提早5分鐘讓高永文發言,他暗忖即使局長發言15分鐘,自己尚有5分鐘,「但佢係講到(11時)59分,我得1分鐘,變咗我要選擇講咩囉。」

曾鈺成最終利用短短1分鐘時間,發表自言「用個肺講出嚟,係肺腑之言」的臨別贈言,包括「我相信,我真係相信,喺議會內嘅每位議員,都係用自己嘅方式為香港服務。」他並說:「祝福香港,香港一定要贏!」
曾鈺成不無感慨說,每次當屆任期最後一次會議結束前,都希望有較融洽的氣氛,讓大家發表善頌善禱的說話,但當時議會氣氛並非如此,「兩個陣營互相對立、互相對罵都好強烈,如果我講打圓場嘅說話,兩邊未必一定接受到……」

感慨兩陣營互視「禍港」壞人

但他說,真心認為所有議員都想為香港做事,只因彼此政治立場與觀點不同,「好可惜互相將對方睇成『禍港』嘅壞人,我唔想講啲嘢出嚟,好似俾任何一邊覺得我為另一邊辯護,或駁斥之前佢哋互相對對方嘅指責……」

他認為大家都會接受其理念,「要為香港好,香港要贏,我認為呢個講法最可能凝聚番成個議會甚至政府官員嘅情緒,即無論我哋有咩分歧,大家都要為香港打拼,香港要贏。」

160720_AM730

 

 

 

 

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s