2014年9月12日 《AM 730》 專訪

人大常委會對普選一錘定音後，泛民主派態度強硬，政改成事機會看似渺茫。一直力促政制向前走的立法會主席曾鈺成未言絕望，會繼續盡力尋求共識機會，他並拋出一個提名程序前的入閘方案，建議沿用選舉委員會的模式，只要在1,200人的提名委員會中取得八分一支持便可入閘參選，各參選人並透過電視辯論比併政綱，進行一場面向全港及中央的真正選舉，然後才讓全體提委決定誰人可出閘做特首候選人。他承認這個方案是讓泛民有機會參與，並回應泛民指人大決定「倒退」的批評，認為是「進步」並值得考慮的建議，但他仍未與泛民商討，坦言泛民現時「怒氣沖沖」，待佔中過後才找尋合適時機向泛民遊說。 記者：鄭秀韻 攝影：林振東

不言絕望 嘗試搵出路

曾鈺成日前接受本報專訪時表示，不評估政改方案獲通過的機會，只說：「梗係知道難！」早前承認過去想法可能太天真的曾鈺成說，「從一開始大家都知道困難，最天真嘅人亦知道困難！」中央與泛民均企硬，呈現眼前的明顯是一個死局，但他說，「我又唔係咁悲觀，大家都要繼續嘗試去搵出路……」他又說，「絕望係冇意思架，一日未曾拉倒，一日都要盡力想辦法，絕望、放棄係冇意思！」

他認為，關鍵在於中央與泛民是否有真正意願希望在2017年落實普選特首，「我希望大家繼續傾，唔好拉倒，如果雙方根本已經死心，咁冇得好講，任何人都做唔到嘢。」那麼雙方是否已死心？「我希望未啦！」他繼而說，「我唔知，因為從邏輯嚟睇，如果真係拉倒，大家都輸……有人話原地踏步對中央冇咩壞處」，但他不是這樣看，「中央一路話有誠意2017年落實普選特首，如果最後唔成功，點都係一個挫折……」「如果雙方仲有意願，大家都要搵一啲覺得有得傾、值得傾嘅議題。」他以提委會的提名程序為例，認為是值得探討的議題，希望泛民不要完全杯葛第二輪政改諮詢。對於坊間猜測政府可能放風拋出一些「啃得落」的特首人選，讓市民接受「袋住先」，曾鈺成認為，不能單以人選來遊說泛民接受方案，「淨係咁唔得，因為泛民都要考慮實際嘅制度，今次就話呢啲人選，咁下次點？你都要諗以後點……」

方案無牴觸人大決定

要讓泛民願意重返談判桌，總要提供一些「甜頭」，他拋出一個入閘方案，建議提委會沿用選委會模式，「全部十足十照做，維持八分一提委可以提出一個人，提晒啲人後，照足以往run一次，只要(攞到)八分一(支持便可)入閘，就可以發表政綱。」他假設泛民何俊仁繼續出選，並假設梁振英、葉劉淑儀及梁錦松落場，4人一同競逐，「香港人今次一樣睇電視，睇1,200人(提名)選出最少2個，最多3個出嚟，然後俾香港人(一人一票)最後話事，係咪進步？」至於1,200人在最後提名階段如何投票，他建議一人最少2票、最多3票，假設有4名參選人，提委對各人逐一投票，任何參選人只要獲過半數支持票便可出閘，假若少於2人或多於3人入圍，則宣告無效。他強調，這個建議方案同樣由1,200名提委以過半數方式提名2至3人出閘，並無牴觸人大常委會的決定。

曾鈺成無透露何時想出這個方案，只說聽到一些意見而有所啟發，「聽到泛民最強烈不滿係話(人大決定)倒退，因為佢哋連出嚟競選嘅平台都冇咗，以前(07年)仲有梁家傑同曾蔭權，上屆(2012年)何俊仁同兩個高佬(梁振英與唐英年)辯論，(以後)冇晒……」他認為，泛民最擔心是即使能夠入閘，「之後無聲無氣篩走佢哋」，他指其方案最吸引的環節，「係之前嗰part(提名程序前)照足以前，俾泛民有參與機會。」

對於方案是否有力遊說泛民接受，他說，「夠唔夠，我絕對唔敢講」，但認為泛民值得考慮，「我會積極睇，佢哋(參選時)亦面向中央，等中央政府睇……有人問你會唔會出嚟叫平反六四？佢都要答，你第日做特首，如果中央任命你，你叫唔叫結束一黨專政？叫唔叫平反六四？香港人睇你，中央都考梗你，睇你答得得唔得體，係咪令中央滿意，或者收貨呢。」

未向泛民摸底 不怕見光死

他指提出「曾鈺成方案」是其個人想法，未有機會與中央官員討論，亦未向泛民摸底，「完全未有時間搵泛民傾，等完晒先，大家都怒氣沖沖，傾咩？等佔中後先囉。」不過，他曾與39名早前發出聯署聲明的班底反映其方案，他引述他們的想法，「佢哋話依家冇用，拋出嚟同泛民傾？

冇人有興趣同你傾」，並認為此時拋方案只會「見光死」，但他笑言，「我又唔係好怕見光死，講道理啫。」

不鼓勵罷課 曾鈺成：學生要思慮

學生罷課事件引起爭議，教育界出身的立法會主席曾鈺成說，學生關心政治是好事，雖然後生仔較易衝動，但他認為應正面看事件。他強調，不會鼓勵或鼓吹學生罷課，但認同部分大學校長所說，學生應考慮清楚及明白後果，「喺學校環境，或一班學生一齊，有所謂peer pressure(同儕壓力)，大家諗清楚，教師、校長亦應以諄諄善誘態度同學生講清楚。」

月中與長毛對談資本論

另外，曾鈺成與立法會議員梁國雄將於本月25日在中大公開對談(圖)，講題為「廿一世紀資本論」，取材自法國經濟學家Thomas Piketty著作《Capital in the Twenty First Century》(《廿一世紀資本論》)，此書今年4月出英譯本，甫出版便登上《紐約時報》暢銷書榜，在學術界引起極大爭議。曾鈺成與長毛兩位愛書人向來惺惺相惜，長毛不時向主席送書，主席以禮相待，月前逛書店買下兩本《廿》，一本送長毛，該書厚達近700頁，長毛笑言「以小博大」，因他送主席的書向來較薄。曾鈺成說，《廿》書閱讀進展很慢，只看了約三成，加上因左眼舊患下周一入院接受手術，笑言「實唔夠佢(長毛)講」。